10 сакавіка спаўняецца 80 гадоў народнаму артысту Беларусі Уладзіміру Гасцюхіну. Тэлеканал “Беларусь 3” падрыхтаваў сапраўдны падарунак для аматараў савецкага і беларускага кіно – паказ кінастужак з удзелам юбіляра.

Кінамарафон адкрывае 9 сакавіка ў 15:30 драма “Вазьму твой боль” паводле твора Івана Шамякіна. Гасцюхін сыграў аднаго з галоўных герояў – Івана Батрака. Герой глыбока перажывае і не можа прыняць вяртанне ў вёску былога паліцая, які вінаваты ў смерці яго маці і сястры.

10 сакавіка ў эфір “Беларусь 3” выйдзе ваенная драма “Узыходжанне” паводле твора В. Быкава “Сотнікаў”, дзе Гасцюхін стварыў адзін з самых моцных вобразаў у сваёй кар’еры. У гэты ж дзень у 15:35 увазе гледачоў прапануюць сацыяльную драму “Паляванне на ліс”. Пераглядзець абедзве драмы можна будзе 11 сакавіка.

12 сакавіка ў праграме тэлеканала запланаваны паказ яшчэ дзвюх кінастужак з удзелам Уладзіміра Гасцюхіна. У 9:45 у эфір выйдзе мастацкі фільм “Старшына”, у 15:45 – драма “Генерал”, у аснову якой пакладзены мемуары вядомага савецкага ваеначальніка Аляксандра Васільевіча Гарбатава. Паўтор фільмаў адбудецца 13 сакавіка.

Акрамя мастацкіх кінастужак, 10 сакавіка ў 11:35 “Беларусь 3” пакажа выпуск праекта “100 пытанняў даросламу”, дзе школьнікі распытваюць акцёра пра жыццё і творчасць.