10 лютага "Беларусь 3" прапануе фінальны выпуск праекта "Кіно маёй краіны", прысвечанага 95-годдзю айчыннага кінематографа. У ім тэлегледачоў чакае музычны сюрпрыз ад творчай каманды дакументальнага серыяла. 

Нагадаем, праект рэжысёра і прадзюсара Белтэлерадыёкампаніі Сяргея Кацьера "Кіно маёй краіны", аўтарам і вядучым якога з'яўляецца іншы рэжысёр і пісьменнік Уладзімір Арлоў, выходзіць на сацыякультурным канале са снежня мінулага года. За многія гады творчай дзейнасці Уладзімір Аляксандравіч працаваў і меў зносіны  са мноствам прызнаных майстроў савецкага і беларускага кіно. Ён ведае ўвесь кінематаграфічны працэс знутры, бо сам зняў не адзін дзясятак карцін. У праграме "Кіно маёй краіны" майстар распавядае пра знакавыя падзеі і свае любімыя стужкі за ўсю 95-гадовую гісторыю айчыннага кінематографа.

Дзясяты, фінальны выпуск серыяла сабраў у гуказапісвальнай студыі медыяхолдынга вядомых дзеячаў беларускага кіно: народнага артыста Беларусі Аляксандра Яфрэмава, заслужаную артыстку Рэспублікі Беларусь Валерыю Арланаву, дырэктара Нацыянальнай кінастудыі "Беларусьфільм" Уладзіміра Карачэўскага, вядучага праграмы "Кіно маёй краіны" Уладзіміра Арлова, а разам з імі карэспандэнта АТН Лідзію Заблоцкую і вядучую праграмы "Навіны культуры" Ганну Панцялееву. Усе разам  пад акампанемент кампазітара і выканаўца, заслужанага дзеяча мастацтваў Беларусі Алега Елісеенкава яны запісалі лірычную кампазіцыю на вершы Сяргея Кацьера "Час кіно", якая і стане завяршальным акордам серыяла аб айчынным кінематографе. 

Апроч музычнага кліпа, які сабраў у адным кадры сяброў і калег па творчым цэху, 10 лютага ў 14:45 гледачоў чакае пазнавальны аповед Уладзіміра Арлова пра сучасны этап беларускага кіно, а адразу пасля яго  паказ дэтэктыўнай стужкі Аляксандра Анісімава "Сляды на вадзе" ("Беларусьфільм", 2016).